Margrét Halldóra Arnarsdóttir var kjörin formaður FÍR árið 2020, þá aðeins 29 ára að aldri og er þar með yngsti formaður stéttarfélags innan ASÍ. Hér sýnir hún lesendum Vinnunnar á sér hina hliðina.

Gælunafn: Margó, en það eru bara mínir nánustu sem nota það, annars er ég alltaf kölluð Margrét.
Fæðingarstaður: Reykjavík
Aldur: 30
Menntun: Sveinspróf í rafvirkjun.
Starfsferill: Starfsmaður í bíó, þjónn, barþjónn, rafvirki, stundakennari og formaður.
Fyrirmyndin: Ég á enga eina fyrirmynd. Ég reyni að sjá kostina í fólkinu í kringum mig og spegla mig í þeim. Ég reyni að tileinka mér þá sem mér líkar til að verða betri útgáfa af sjálfri mér.
Helsta afrek: Hingað til er það líklega að þora að henda mér í djúpu laugina fyrir sex árum og skrá mig í karllægt iðnnám og allt sem fylgdi í kjölfarið á því vali. Ef einhver hefði sagt mér fyrir sex árum hvar ég myndi enda hefði ég ekki trúað einu orði.
Stærstu mistök: Öll augnablikin sem ég hef efast um eigin hæfni.
Draumurinn: Að allt gangi samkvæmt planinu.
Kennarinn: Af þeim sem hafa kennt mér eru það Guðný Lára og Ófeigur. Sanngjörn, skemmtileg og ótrúlega fróð.
Óttinn: Svo margt en óttinn fer minnkandi eftir því sem ég átta mig meira á og læri að yfirleitt er hann yfirstíganlegur og það versta gerist sjaldan.
Bókin: Engin því ég les skelfilega lítið.
Kvikmyndin: Mamma ól mig upp við að horfa á Star wars svo ég held ég verði að segja Return of the Jedi.
Tónlistarmaðurinn: Jóhanna Guðrún, annars enginn sérstakur. Ég hlusta eiginlega á allt en það fer eftir stemningu hverju sinni.
Platan: Engin sérstök.
Lagið: Einhvers staðar einhvern tímann aftur með Mannakorn, annars fer það eftir skapi.
Landið: Ísland
Borgin: Palma
Staðurinn á Íslandi: Öræfin
Flippið: Þegar ég var mjög ung og tók naglalakkið hennar mömmu og naglalakkaði á bak við náttborðið hennar línu úr hverjum lit. Fannst ekki fyrr en mörgum árum seinna þegar við vorum að flytja og ég stríði þeim enn þá í dag með að vilja ekki segja af hverju ég gerði þetta.
Áhugamálið: Framkvæmdir heima fyrir, skíði og málefni stéttarfélaga, þá sérstaklega rafvirkja.
Hippi eða pönkari: Hvorugt
Íþróttaafrek: Að vinna limbókeppni á ættarmóti.
Stefnan: Að vera samkvæm sjálfri mér, þroskast og verða enn betri.
Ef þú mættir velja þrjár manneskjur, lífs eða liðnar, til að bjóða í kvöldmat, hverjir yrðu þá fyrir valinu: Það er einfalt, ömmu mína og afa mína tvo sem eru látin. Önnur amma mín er enn á lífi svo ég hef enn þá tækifæri á kvöldmat með henni en ég gæfi mikið fyrir kvöldstund með þeim öllum fjórum saman.